Все привыкли слышать Мавлид на аварском языке. Его читают на большинстве телеканалов.  Но недавно Баху-Меседу Расулова перевела Мавлид с аварского на каратинский язык. Теперь этот Мавлид доступен всем читающим этот сайт.

Мавла яса ливаса линда иман абада
Г1ала х1аби бикахвай рильхал къеку легьеме.
Даимоб, абадийоб салатк1ел салам билъа
Гидоловада кь1абов дув Х1абиб Ах1мадия.
Свалатк1ел салам билъа,Аллагь, дув Расулия
Дубда рах1мат о кьвани, гьиндалагол бич1ач1об.
Амин Аллагь, я Аллагь,Амин Аллагь, я Аллагь,
Амин Аллагь, я Аллагь, къабул гагьа Бет1ергьан.

Аллащува реццидя иман илъя беккала,
Аварагшува – свалат,ислам илъя малъала.
Иман – ислам малъалъа Расуллъе уншя вужав
Мух1маммад аварагщуб г1урмилъ басанлъа идя.
Бет1ергьанщул дуняллъя халкъе бижвалъа сиги
Бижвайдя Мух1аммадиб гьеч1е ч1икороб нуре.
Бежвалъа бажарач1об,басанлъал балъидач1об,
Гьоб нурягал бижвайдя решинва милъел борц1ол.
Гьошва билъе бажвайдя дуняллъия г1аданди.
Г1аламяда рах1матлъе Рах1манощул жев гогьов
Г1аршияк1ел Курсия ц1ери инщубел анлъов.
Инщуб динилъ къимат ге хирхир Расул итач1ов,
Инщуб Къуръан о ц1акъаб цебелел хъоча гьач1ов.
Жев гьерч1об заман баил ч1аго бахвалис хидихъ
Гьошва кумак гагьаскье аварагдилол кекьов.
Аллашва гьеч1е кь1абов авараг жев вук1арил
Гьощуб уммател болълъе Бет1ергьанщува хираб.
Гьеч1е сиги Алжанлъир баанлъа изну идаб.
Мах1шарилъ гидаб агьлул кумак иншвагал хадов,
Гидаб халкъул г1аламил нафскье кекьиндоб къварлъил
Нафскье кекьенч1ебоха умматкье кекьов Х1абиб.
Умматия гурх1едов, кумакия вусиндов,
Къиям зебулъ къоралъер иншвагал бигьалъидов,
Муъминдилва ц1аралъа кавсарилъ лъей беккидов,
Беккакьа Бет1ергьанщул илъя гьощуб щафаг1ат.

Мавла ясали васа линда иман абада
Г1ала х1аби бика хвай рильхал къику легьеме…

Гегьилада авараг сужда гейдя валъейдя,
Малаикдил бахьвавха вучайдя, вогужайдя.
Лъоваг1аги гьаанч1ов щайхщуб лъарч1ч1у анлъейдя
Волъа гьера гьов Х1абиб Магърибк1ел Машрикъяркье.
Решин – унщида инщухъ урхъуха вук1ав Х1абиб
Умматяр хидил сора релъа кванлъалъадакье.
Марх1аба, Х1абибуллагь, Аллащул итав Расул
Рабиг1ул авал борц1олъ 12лъоб зебул
Гегье идя Маккалъя илъив хирав авараг.
Г1аламалъерди кьвани ралъейдя гьоб зебулъил.
Капурдилол кавкай ге хъулухъ гейдорай хъанчди

Къинлъи кехоб гуригал т1аре гъардир рахьвайдя.
Кисра Аннуширваниб бечедаб миса – хъала
Баххехе гъардир боа ч1ваде годоб болъейдя.
Бишдя къора бисимар аварагщуб щафаг1ат,
Бит1а рак1ва-рак1вагал Мух1аммадия свалат.

Мавла ясали васа..

Илоч1о баквалида имя вуч1а вухуйдя,
Инлъидалъоб решинлъил хирхир илал йич1айдя.
Какилолъ иля гьощуй Х1алиматкье йик1вайдя
Кехалъа гьолъил волъа илъатов илъив Х1абиб.
Х1алимател бискиной йик1ва идя гьов годой.
Авараг кехалисда гьой маквалъ1а йихуч1е,
Ц1еналъолъ щив кьванилъе, гидоловада беу.
К1еда решинлъил кеха, хирхир борц1адил раа.
Хиди ваалъа заман баала бикь1е бик1ва.
Бик1убарил ц1иянлъа гимич1екье лъебевха
Гьерк1ав имохар ваа илъия хирав Х1абиб.
Гьов вуч1алада хирхир ихьваче имов вацол.
Мик1об къварлъилда Х1абиб кавка – диния вугъе.
Лъолаг1аги малъеч1е дини инщвада биа.
Гьац1ал к1едалъоб решин Ах1мадиб бехьваб къварлъил
Волъа Абут1алибил Сару Сиряр базаркь1ар.
Шамалъя Бусра вусав цев рагьибшул бац1ейдя
Гьацев ч1икоров ваша гьингалол вохьавкьевха,
Ахир заманилъ Наби гьач1елахъ гьавкье идя.
К1едал ауч1о бакьи Аллащуб хираб печать
Гьаанлъер балъго гейдя ягьудилва биаскье.
Биибар аварагщва зара гвала гьагьаскье.
Гьошува икрам гегье, Аллашва рецци гегье
Гьера лъалухъ гьерч1ч1ерел бакъобкье гьаа идя.

Бишдя къора бисимар аварагщуб шафаг1ат
Бит1а рак1ва-рак1вагал Мух1аммадия свалат.

Мавла ясали васа…
Марх1аба, я марх1аба, я марх1аба, марх1аба,
Жаддал Х1усейни марх1аба.
Я Х1абиби, я Мух1аммад, дува гьерк1ам саламдя
Дув к1едалда чокъащувал салам беккида идя.
Борц1ок1ел ц1ваел милъел
Дуб нурил гвангъа идя.
Милъел мен идя ,Мух1аммад, борц1ол дуб баг1а идя,
Мен ишя хирав Сайид, Сайиддилолъил сигис.
Мен ишив гьерк1ав имам , имамдилов гьадуа,
Нафскье гьордол к1к1анк1адангил
Умматкьебоха к1к1андов.
Я Х1абиби, я Мух1аммад, марх1аба, я марх1аба,
Шафаг1ат къорабай иши дува х1еледа идя.
Я Х1абиби. Я Мух1аммад, марх1аба, я марх1аба,
К1к1вабабисен мена хиди гьаб ишил гегьидоб хар.
Я Х1абиби, я Мух1аммад, марх1аба я , марх1аба
Мена рекь1а бикка ишиб Сират1 хардоб къварилъил.
Амин Аллагь, я Аллагь, амин Аллагь, я Аллагь
Амин Аллагь, я Аллагь,къабул гагьа, Бет1ергьан.

25 решин бехьвав Х1абиб ц1яда итайдя
Хадижатилъ гьедела бичалъа Шамалъияр.
Милъе бокьоб дуняллъя Аллащул гьошва каа
Гьанкь1у бик1вайдя бигъа серк1к1у – серк1к1у боиндоб.
Х1абиб авараг вук1аб Хадижатя биала
Бечедай йик1убарил гьошува ехьва идя.
Гьеч1е сиги бусурбан динил гьолъил бегьейдя.
Маккалъилъ гидаб халкъе диня данде бигъала
Х1ираъ кьидоб кьедалъи речч1ай гьини вугъейдя.
Боазда решин бехьул т1аг1атия вук1айдя,
Боазда бехьвалада каар вах1ю рушт1айдя.
Хири Расулуллагьщул рисалат гегье идя,
Капурлъеря бак1вабай исламияр к1к1а идя.
Аллащул вут1е воккав исламияр вохьайдя.
Абучагьариб халкъе капурлъеря бигъейдя.
Бишдя къора бисимар Мух1аммадиб шафаг1ат
Бит1а бишдил гьошува рак1ва-рак1вагал свалат.

Мавла ясали васа…

Миг1ражилъ релъадалъил Сайид илъив авараг
Гьакьудал решин ругьа харе идя Аг1лаяр.
Аллашул вах1юлъевха Жабраг1илел итавха
Инщвада хирав Х1абиб к1к1а идя решинакьир.
Маккалъягал балъавха Масжидул акъсар раил
Милъилагалел хехоб буракъия рек1вайдя.
Масжидул акъса каа анбиябдил данделъе
Ах1мадил имамлъер ге жамаг1ат кавка гейдя.
Гьоргалел Жабраг1илщул миг1ражияр волъайдя,
Вах1ю рушт1ундоб микъахъ решинакьир баайдя.
Сидратияр баала жевда сидихъ итайдя,
Кьек1у сидихъ воанлъа иншва хьолъидач1екье.
Алжанлъинир ваайдя, жужах1ел гьаа идя,
Релъа –зебва к1яц1 ишду кавка каа билъейдя.
Ишдуда биххул хавха кагаал бохъе идя.
Релъагвал кванлъеч1еда къайкь1ар хиди сорейдя.
Бишдя къора бисимар аварагщуб щафаг1ат
Бит1а рак1ва-рак1вагал Мух1аммадия свалат:

Мавла ясали

Расулуллагь к1вабалъа капурди ургъоб къварлъил
Макка шагьар бешдавха Х1абиб хиди воайдя.
Сару гьалмагълъерия Абубакар вохьайдя,
Савру кьидоб кьедалъи речч1ай гьини бигъейдя.
Харазанолк1ел гъугъул эла берхьванди гала
Капурдилва ц1ва идя реч1ч1ай г1адам гьач1екье.
Хирхир т1аробай гьобай хиди соре баайдя,
Абубакарк1ел Х1абиб Мадинарел баайдя.
Гидаб Мадиналъ халкъе гьордва данде бехьвайдя.
Индоч1о рушт1укьевха аварагшвар ха идя.
Варани бигъоб гури рушт1анс жевкьел кекьевха
Жебда гьоб ита идя баргьанел биккеч1евха.
Варани боа идя Сайид Аюбиб ъвалкьар.
Гьорге рушт1ав авараг гидололда гьерк1айдя.
Ансардилол кумак ге капурлъерел гъоревха,
Мадиналъ гидаб халкъе динияр сора ида.
Гьорге мажгител гегье динилъ къувател ц1ик1к1е.
Бикьида решинвагал Макка бохъалъал балъе.
Каг1ба бец1е рак1варай хъанчдил рахъевха гъоре.
Хъанчя кавкай гедобайл дини гегьеч1вар к1к1вабе.
Илъив гьов аварагщуб гьунар, кьварелъер баса
Кьвани бехелабич1е, гьоб баса бахъендач1е.
Гьощуб г1акълук1ел г1елму, г1адам хиралъер хъваре
Хъоча чаморда бец1ас , илъя бажарайдач1е.
Решинакьир волъовха малайкщул рак1ва бохъов,
Жабраг1илщул гьолъия Аллащуб печать к1к1вабов,
Г1арабябдилоб мац1илъ, бац1ц1адоб наслу идав,
Къурайшёлоб тухумилъ, гьашимёлоб кьибилилъ,
Авараг , ишиб дувар гьерк1ам хар – аман идя
Ишия кумак гагьа къиям зебу баала.
Мавла ясали васа….